Udal-ekintzak
Klimaren aldeko herritarren batzarra

2025eko otsailaren 22an, Bilbok aurrerapauso nabarmena eman zuen jasangarritasunarekin duen konpromisoan, Klimaren aldeko Herritarren Batzarra inauguratu zuenean. Foro parte-hartzaile horrek Bilboko 50 bizilagun biltzen ditu —25 emakume eta 25 gizon—, zozketa bidez hautatuak udalerriko aniztasun demografikoaren erakusgarri adinari, jatorriari eta ikasketei dagokienez. Borondatez onartu dute ekimen honetan parte hartzea. Klima-aldaketa arintzeko neurri eraginkorrak eztabaidatzea eta proposatzea du helburu.

Batzarraren saioak 2025eko otsaila eta ekaina bitartean egingo dira, zapatu goizetan Deustuko eta La Bolsako udaltegietan. Sei topaketa izango dira guztira. Prozesuaren egiturak hiru fase ditu:

Lehenengo fasea, prestakuntza eta eztabaida.

Lehenengo lau saioetan, klima-aldaketaren eta jasangarritasunaren arloetako adituen informazioa jasoko dute parte-hartzaileek. Lehenengo fasea amaitzeko, aholkuen hasierako zerrenda bat egingo da.

Bigarren fasea, ebaluazio teknikoa:

Bosgarren saioan, udal teknikariekin batera proposamenak aztertuko dituzte, haien bideragarritasun ekonomikoa, soziala eta legala ebaluatzeko.

Hirugarren fasea, azken aurkezpena:

Azken saioa proposamenak amaitzeko izango da, eta Udalari emango zaizkio. Udalak konpromisoa hartu du horietako bakoitzari erantzuteko, proposamen horiek udal-politiketan nola txertatzen diren kontuan hartuta.

Ekimen hau bat dator Eusko Jaurlaritzaren Klima Aldaketaren eta Trantsizio Energetikoaren 7/2021 Legearen jarraibideekin, eta 2030 Agendaren eta Europako Itun Berdearen helburuak islatzen ditu. Gainera, Europako beste hiri batzuetan izandako antzeko esperientzietan oinarritzen da, ingurumen-erabakiak hartzean herritarren parte-hartzea sustatuz.

Nora Abete Bilboko Mugikortasun eta Jasangarritasun Saileko zinegotziak aurkezpen ofizialean nabarmendu zuenez, helburu nagusia da “klima-aldaketaren aurrean nola jokatu behar den azaltzen duten ideiak eta proposamenak partekatzea eta Udalarentzako aholkuen zerrenda bat egitea”. Bestalde, Víctor Trimiño Jasangarritasuneko zuzendariak azpimarratu zuen oso garrantzitsua dela demokrazia deliberatiboa erabiltzea klima-erronkei justizia sozialarekin aurre egiteko.

Klima Aldaketaren eta Trantsizio Energetikoaren maiatzaren 20ko 7/2021 Legeak (Eusko Jaurlaritzak promulgatua) planteatzen dituen gomendioei Udalak emandako erantzuna ere bada Klimaren aldeko Herritarren Batzarra eratzea.

Bilboko Klimaren aldeko Herritarren Batzarra herritarrek parte hartzeko eredu aktiboa da. Tokiko komunitateak hiriko ingurumen-politiketan zuzenean eragiteko aukera du, eta, hala, etorkizun jasangarriagoa eta erresilienteagoa lortzen laguntzen du.