• Bilbotarrek hiria eta auzoak hobetzeko egokienak iruditzen zaizkien proiektuen alde eman dezakete botoa irailaren 27ra arte, www.bilbao.eus  webgunean.
• Inprimaki soil baten bidez, edo aurrez aurre, udaltegietan dauden Bilbaoclick makinen bidez.
• Parte-hartze bidezko IX. aurrekontuetan 590 proposamen jaso dira guztira, haietako 18 Haurren Kontseilutik (edizio honetako berrikuntza). Proposamen guztietatik, udal sailek 37 proiektu hautatu dituzte, haien interes orokorra, egokitasuna, eta bideragarritasun tekniko eta ekonomikoa irizpide hartuta.
• Bilbon erroldatuta dagoen 16 urtetik gorako edonork nahi beste ekimen bozkatu ditzake, baina boto bakarrarekin, eta aurrekontuko 2 milioi euroak gainditu gabe.

Bilboko Udalak herritarren bozketarako epea ireki du gaur, irailaren 27ra arte, bilbotarrek erabaki dezaten zein herri-ekimen sartu nahi dituzten 2025eko udal aurrekontuetan. Parte-hartze bidezko IX. aurrekontuen azken fasea da; prozesua bukatzeko, guztira 37 herri-proiektu bozkatuko dira.

Aurten, Bilboko Udalak herritarren 590 proposamen jaso ditu hiria eta auzoak hobetzeko, 2025eko parte-hartze bidezko aurrekontuen udal-programaren bederatzigarren edizioaren testuinguruan. Proposamen horietatik 18 Haurren Kontseilutik etorri dira, edizio honetako berritasun gisa (horrela identifikatu dira).    Irailera arte, udal sailek teknikoki eta ekonomikoki bideragarriak diren ideiak lehenetsi eta hautatu dituzte, interes orokorreko, egokitasuneko eta udal-estrategiako irizpideei jarraituz. Prozesuaren ondorioz, 37 herri-proposamen herritarren bozketa-fasera igaro dira.

NORK ETA NOLA EMAN DEZAKE BOTOA

Herritarrek gaurtik, gaur irailak 16, irailaren 27ra bitartean bozkatuko dituzte –web bilbao.eus webgunearen bidez– Bilborentzat onenak deritzeten proiektuak. Bilbon erroldatutako 16 urtetik gorako pertsona orok parte hartu ahal izango du bozketan, eta bakoitzak boto bakarra izango du. Horretarako, inprimaki sinple bat prestatu da, eta bertan identifikazio-agiria eta jaiotze-data erroldarekin baliozkotuko dira. Inprimaki hori udaltegietako Bilbaoclick makinen bidez ere eskura daiteke. Beharrezkoa izanez gero, udal langileei laguntza eskatu ahal zaie.

Boto-emaileak gehienez 2 milioi euroko proiektu guztiak aukera ditzake formularioan, baina behin bakarrik bidal dezake formularioa. 37 proiektuak herritarrek eskatutako 80 proposamenekin lotzen dira (izan ere, antzeko proposamenak bozketa-proiektu bakarrarekin lotzen dira).

2 milioi euroko aurrekontura heldu arte boto gehien jasotzen dituzten proiektuak 2025eko udal aurrekontuen proiektuan sartuko dira.

Bilboko parte-hartze bidezko aurrekontua prozesu irekia da, bilbotarrei aukera ematen diena Udalaren urteko aurrekontuaren zati bat erabiltzeko ideiak eman eta proposamenak egiteko. Ondokoek parte har dezakete prozesuan: hamasei urte baino gehiago dituen eta Bilbon erroldatuta dagoen pertsona orok, Herritarren Partaidetzako Entitateen Udal Erregistroan inskribatuta dagoen entitate orok, legez eratuta dagoen edozein entitatek (elkarteak, fundazioak, sindikatuak, elkargo profesionalak eta zuzenbide publikoko korporazioak) eta Bilboko ikastetxe orok.

Kasu guztietan, Udalaren sail eta programaren batekin zerikusia duten proposamenak aurkeztu ahal ziren, hiri osorako edo barrutiren baterako interesgarriak, www.bilbao.eus webgunean dagoen inprimakia betez. Eskabide–inprimaki bakoitzean proposamen bakarra egin zitekeen, eta proposamenak kontuan hartuak izateko baldintza batzuk bete behar ziren: Udalaren eskumenekoak, legezkoak, interes orokorrekoak eta egingarriak izatea, 300.000 eurotik gorakoak ez izatea eta 2025ean gauzatu ahal izatea.