Urtero, martxoaren 21ean Basoen Nazioarteko Eguna ospatzen dugu, NBEk baso mota guztien garrantzia eta horiek babesteko beharra aldarrikatzeko eguna. Basoak funtsezkoak dira Lurreko bizitzarako: klima erregulatzen dute, CO₂,a xurgatzen dute, biodibertsitate anitza dute eta oinarrizko baliabideak ematen dizkiete pertsonei.

Bilbon, baso-masa handirik ez dugun arren, baditugu hiri-jasangarritasunean funtsezkoak diren espazio naturalak eta parkeak. Ingurune berdez eta mendiz inguratuta gaude, eta horiek ezinbesteko funtzio ekologikoak betetzen dituzte. Adibidez, Artxanda, Pagasarri edo Arnotegi ditugu, aterpe naturalak, biodibertsitatez beteak. Ingurune horietan bertako espezieak -haritza, pagoa eta lizarra-, basa-fauna -azeria, europar trikua eta hegazti klase asko, hala nola kaskabeltz handia eta miru beltza-, aurki ditzakegu.

Eta horrez gain, Casilda Iturrizar, Europa eta Etxebarria parkeak ditugu hirian bertan, hiri barruko birika berde txiki gisa jokatzen dutenak, kutsadura murriztuz eta herritarren bizi-kalitatea hobetuz.

Hiri-hazkundeak, deforestazioak, baso-suteek eta espezie inbaditzaileen hedapenak arriskuan jartzen dituzte Bilbo inguratzen duten naturguneak. Zuhaitzen galerak biodibertsitatea murrizten du eta gainera, airearen kalitatean eta hiriaren erregulazio termikoan ere eragiten du.

Funtsezkoa da ingurune horiek babestea, espezie autoktonoekin baso-berritzea sustatzea eta hiri-basoen eta hiri-inguruetako basoen kudeaketa jasangarria bermatzea.

Zer egin dezakegu?

Bilboko Udaletik berdeguneak zaindu eta handitzea sustatzen dugu, basoak berritzeko, parkeak mantentzeko eta eremu naturalak babesteko programen bidez. Zuk ere baduzu laguntzerik, ekintza txikiekin:

• Parte hartu baso-berritzeetako jardunaldietan. Egin bat Bilbon eta inguruetan zuhaitzak landatzeko ekimenekin.
• Zaindu hiriko zuhaitzak: ez kalterik egin kaleetako eta parkeetako zuhaitzei, eta lagundu kontserbatzen, esaterako, bistan dauden sustraiak ez zapalduz.
• Prebenitu baso-suteak: Mendira edo naturguneetara bazoaz, bete prebentzio-arauak, eta ez piztu surik arrisku-garaietan.
• Murriztu paper- eta egur-kontsumoa. Aukeratu produktu birziklatuak eta ziurtatuak, baso-kudeaketa jasangarria bermatzen dutenak.
• Zabaldu basoen garrantzia: Partekatu informazioa eta sentsibilizatu zure ingurua gure berdeguneak babesteko beharraz.

Basoak babeste gure etorkizunaren eta gure planetaren osasunaren alde egitea da. Jagon ditzagun Bilboko eta haragoko gune berdeak!