Martxoaren 22an Uraren Munduko Eguna izaten da urtero. Egun hori ezinbestekoa da hausnartzeko zein garrantzitsua den baliabide hori bizitzarako eta garapen jasangarrirako. Urak Lurraren azaleraren % 71 inguru estaltzen badu ere, ur geza % 2,5 baino ez da, eta horren % 1 baino gutxiago dago eskuragarri gizakiarentzat (gainerakoa glaziarretan edo akuifero sakonetan dago).

Uraren Munduko Eguna Nazio Batuen Batzar Nagusiak ezarri zuen 1992an, eta 1993az geroztik ospatzen da, ur gezaren garrantziaz eta modu jasangarrian kudeatzeko beharraz kontzientziatzeko.

Urte bakoitzean gai baten zentratzen da, eta 2026an hau da leloa: “Ura dabilenean, berdintasuna hazten da”. Ikuspegi horrek edateko ura eskura izatearen eta gizarte-berdintasunaren arteko lotura zuzena uzten du agerian; izan ere, komunitateek putzu garbiak, txorrotak etxean eta komun seguruak dituztenean, guztion bizitza hobetzen da, batez ere emakumeena eta neskatoena. Izan ere, urik gabeko 3 etxetatik 2tan, emakumeak dira ura biltzearen ardura dutenak, eta egunean 250 milioi ordu ematen dituzte zeregin horretan.

Espainian, etxeko zuzeneko ur-kontsumoa 128 litro ingurukoa da eguneko eta pertsonako; hau da, dutxan, garbigailua/ontzi-garbigailua jartzen, janaria maneiatzen, edaten eta antzeko ekintzetan erabiltzen dena. Gainera, nahiz eta kopuru unibertsalik ez egon aztarna hidriko jasangarri baterako, Osasunaren Mundu Erakundeak uste du oinarrizko beharrak betetzeko nahikoa dela pertsonako eta eguneko 50-100 litro (erabilera zuzena). Beraz, kontsumo jasangarritzat ezarritako kopurutik nahiko gainetik gaude.

Azken batean, Uraren Munduko Egunak gogorarazten digu baliabide ugaria dela dirudien arren, bere benetako erabilgarritasuna mugatua dela, eta hura eskura izateko aukera desberdina dela munduko leku batzuetan eta bestetan. Kontsumoa murrizteak, kudeaketa hobetzeak eta ohitura arduratsuagoen alde egiteak, planetaren jasangarritasunari ez ezik, gizarte bidezkoago bati ere laguntzen dio. Gaur ura zaintzeak bizitza eta berdintasuna bermatuko ditu bihar.