Natura lehengoratzea gure garaiko erronka kolektibo handietako bat bihurtu da. Klima-aldaketak, biodibertsitatearen galerak eta ekosistemen degradazioak markatutako egoera batean, ibaiak, basoak, hezeguneak, kostaldeak eta nekazaritza- eta hiri-inguruneak berreskuratzea ez da soilik ingurumen-kontua: osasun publikoaren, gizarte-kohesioaren eta garapen jasangarriaren aldeko apustua ere bada.

Esparru horretan, Espainiako Gobernuak, Trantsizio Ekologikorako eta Erronka Demografikorako Ministerioaren bidez, abian jarri du Natura Lehengoratzeko Plan Nazionala egiteko prozesua, Europako Parlamentuak eta Europar Batasuneko Kontseiluak ekosistemak berreskuratzearen arloan dituzten Europako helburuekin bat etorrita.

Prozesu horren zati modura, herritarren kontsulta publikoa gaitu da, gizarteak gaur egungo ingurumen-erronkak zelan hautematen dituen eta gure lurraldeen etorkizunerako funtsezkotzat jotzen dituen lehentasunak zeintzuk diren jakiteko.

Bildutako informazioa aztertu eta Planaren azken idazketan sartuko da, eta honako hauetarako neurri zehatzak definitzen lagunduko du:

• Ekosistema degradatuak berreskuratzeko.
• Konektagarritasun ekologikoa hobetzeko.
• Naturan oinarritutako irtenbideak bultzatzeko.
• Muturreko fenomenoen aurrean (lehorteak eta uholdeak) erresilientzia indartzeko.
• Ingurumenaren lehengoratzea hiri- eta landa-plangintzan txertatzeko.

Herritarren parte-hartzea funtsezko elementua da plan eraginkor, anbizio handiko eta gizarte- eta lurralde-errealitatearekin lotutako bat egiteko. Herritarren, profesionalen, gizarte-erakundeen eta produkzio-sektorearen esperientzia eta pertzepzioa funtsezkoak dira politika publiko inklusiboagoak eta eraginkorragoak diseinatzeko.

Kontsultari erantzutea prozesu erraza da eta minutu gutxi batzuk baino ez dira behar. Gainera, zure ingurunearekin partekatzen baduzu jende gehiagorengana iritsiko da eta azken emaitza aberastuko da.

👉 Hemen dago kontsulta: https://lnkd.in/dR2Ec3Jy

Ekarpenak bidaltzeko epea martxoaren 31ra arte egongo da zabalik.