MEZULARITZA JASANGARRIA

Mezu digitalak bidaltzeak –adibidez, mezu elektronikoak eta WhatsAppeko mezuak– ingurumen-inpaktua du, zerbitzarien, telekomunikazio-sareen eta gailu elektronikoen energia-kontsumoaren ondorioz. Karbono-aztarna txikiagoa da komunikazio-metodo tradizionalena baino (posta arruntarena, esate baterako), baina, modu masiboan erabiliz gero eta datuak biltegiratuz gero, inpaktua esanguratsua da.

  1. Nola kutsatzen du mezu elektronikoen eta WhatsApp mezuen bidalketak?

Ingurumen-inpaktua hiru iturri nagusitatik dator:

  • Zerbitzarien eta datu-zentroen energia-kontsumoa: Mezu elektronikoak eta WhatsAppeko mezuak biltegiratze- eta prozesatze-zerbitzarien bidez garraiatzen dira. Zerbitzari horiek egunean 24 orduz funtzionatzen duten eta elektrizitate asko kontsumitzen duten datu-zentroetan daude. Google, Microsoft eta Meta bezalako enpresek datu-zentro erraldoiak erabiltzen dituzte, etengabe hoztea eta mantentzea behar dutenak.
  • Telekomunikazio-sareen energia-kontsumoa: E-mailek eta mezuek zuntz optikoko sareen eta telefonia mugikorreko dorreen bidez bidaiatzen dute, eta horrek elektrizitatea eskatzen du datuak transmititzeko.
  • Erabiltzaileen gailuen energia-kontsumoa: Ordenagailuek, mugikorrek eta beste gailu batzuek mezuak bidaltzeko, jasotzeko eta biltegiratzeko erabiltzen duten energiak ere karbono-aztarna areagotzen du.
  1. Zergatik kutsatzen du mezu elektronikoen eta WhatsApp mezuen bidalketak?

Hodeian bidali eta gordetako mezu bakoitzak baliabideak kontsumitzen ditu, arrazoi hauengatik:

  • Zerbitzarietan eta sareetan jarduteko behar den energiagatik
  • Mezu elektronikoak eta erantsitako fitxategiak hodeian luzaroan biltegiratzeagatik
  • Maiz kargatu eta softwarea eguneratu behar duten gailu elektronikoak erabiltzeagatik
  • Datu-trafikoaren hazkunde esponentzialagatik, mezuen bidalketa masiboak bultzatuta; horietako asko, gainera, ez dira beharrezkoak (spama, newsletterrak, kopia automatikoak, etab.).
  1. Zenbat kutsatzen du mezu elektronikoen eta WhatsApp mezuen bidalketak?

E-mailak

  • E-mail soil batek (eranskinik gabe) 0,3 gramo CO2 inguru sortzen ditu.
  • E-mail batek, erantsitako fitxategi batekin (MB 1), 17 gramo CO2 inguru.
  • Mezu elektroniko batek, irudi astunekin, eta zenbait fitxategi erantsita, 50 gramo CO2 inguru.
  • Urtebetean biltegiratutako mezu elektronikoen GB 1ek, 32 kg CO2.

Spama ingurumen-arazo handia da:

320.000 milioi mezu elektroniko bidaltzen dira egunean munduan.

Spama mezu elektronikoen trafikoaren % 45 da.

Spam izaerako mezu elektroniko guztiak sarrera-ontzietara iritsi aurretik ezabatuko balira, urtean 33 TWh elektrizitate aurreztuko litzateke, alegia, 1,5 milioi etxeren urteko kontsumoaren baliokidea.

WhatsAppeko mezuak eta testu-mezuak

  • WhatsAppeko mezu bat, testu laburrekoa, 0,2 gramo CO2 inguru.
  • MB 1eko argazki bat, WhatsAppez bidalia, 10 gramo CO2 inguru.
  • Minutu bateko bideo bat (10 MB), WhatsAppez bidalia, 100 gramo CO2 inguru.
  • 100 MBko fitxategi bat, WhatsAppez bidalia, kg 1 CO2 inguru.

WhatsAppek mezu elektronikoek baino gutxiago kutsatzen du testu huts gisa, baina, multimedia-fitxategiak bidaltzen direnean, inpaktua izugarri handitzen da.

  1. Ingurumen-inpaktuaren konparazioa:
Ekintza Sortutako CO2
E-maila, eranskinik gabe 0,3 g
E-maila, eranskinarekin (MB 1) 17 g
WhatsAppeko testu-mezua 0,2 g
MB 1eko argazkia WhatsAppen 10 g
10 MBko argazkia WhatsAppen 100 g
Urtebetez biltegiratutako mezu elektronikoen GB 1 32 kg

 

Perspektiban jartzeko:

MB 1eko milioi bat mezu elektronikok 17 tona CO2 sortzen dute, hau da, gasolina-auto batean 85.000 km egitearen baliokidea.

Urtean 10 GB e-mail gordetzen dituen erabiltzaile bakar batek 320 kg CO2 sortzen du, hau da, Madrildik Parisera egiten den hegaldi batek bezainbeste.

  1. Nola murriztu mezu elektronikoen eta WhatsAppen inpaktua?
E-mailak WhatsApp eta mezularitza
Ezabatu behar ez diren mezu elektronikoak, batez ere eranskin handiak dituztenak Ez bidali beharrezkoa ez den argazki ez bideorik
Eman baja newsletter-ei eta spam-zerrendei Bidali aurretik, konprimatu irudiak
Ez “erantzun guztiei”, beharrezkoa ez bada Ezabatu txat eta multimedia fitxategi zaharrak
Eranskinak murriztu eta konprimatu Desaktibatu fitxategien deskarga automatikoa
Erabili hodeian biltegiratzeko plataforma eraginkorrak  

 

Datuon iturriak:
  • ADEME (Agence de l’Environnement et de la Maîtrise de l’Énergie, Frantzia): Posta elektronikoaren ingurumen-inpaktuari buruzko azterlan xehatua egin zuen.
  • The Shift Project (jasangarritasunari eta digitalizazioari buruzko think tank frantsesa): Teknologia digitalak klima-aldaketan duen inpaktuari buruzko ikerketak argitaratu zituen.
  • Carbon Literacy Project eta Mike Berners-Lee (How Bad Are Bananas? The Carbon Footprint of Everything liburuaren egilea): Mezu elektronikoen eta mezularitzaren karbono-aztarnari buruzko kalkuluak.
  • Lancasterreko Unibertsitatearen azterlanak: Negozioen e-mailen inpaktua eta energia-kontsumo globalari egiten dioten ekarpena aztertu zituen.
  • Google, Microsoft eta Amazon Web Services (AWS)-en datuak datu-zentroen energia-kontsumoari buruz.