Aurten ere, Bilboko Udalak bat egin du Planetaren Ordua kanpaina globalarekin, klima-aldaketaren aurkako eta natura babesteko konpromisoa berresteko.

Argia itzali. Planetaren alde lelopean, martxoaren 22an (zapatua), 20:30etik 21:30era, munduko han eta hemengo udalek, herritarrek, enpresek eta erakundeek argiak itzaliko dituzte ordubetez, keinu sinbolikoa eginez, ingurumen-inpaktua murrizteko premiaz kontzientziatzeko.

Bilboko Udalean lanean jarraitzen dugu gure hiria jasangarritasunaren arloko erreferente bihurtzeko. Planetaren Ordua ekimena ingurumenaren arloko beste ekimen batzuei gehitzen zaie, hala nola mugikortasun jasangarria sustatzeari, hiriko biodibertsitatea babesteari eta ikastetxeetako ingurumen hezkuntzari, 2030 Eskola Agendaren bidez.

Gainera, gure naturguneak hobetzearen eta funtsezko hiri-ekosistemak -esaterako, hezeguneak- berreskuratzearen aldeko konpromisoa hartuta daukagu Bilbon. Inguru horiek jagotea funtsezkoa da klima-aldaketaren ondorioak hain larriak izan ez daitezen eta bertoko fauna eta flora babesteko.

Informazio gehiago eta hedapen-materialak hemen eskura daitezke: https://horadelplaneta.wwf.es/

Nola parte har dezaket?

Zuk ere Planetaren Orduarekin bat egin dezakezu, etxeko argiak itzaliz eta funtsezkoak ez diren aparatu elektrikoak ordubetez deskonektatuz. Baina ekintza ez da hor amaitzen: keinu txiki bakoitzak garrantzia du klima aldaketaren aurkako borrokan.

Martxoaren 22an, bat egin gurekin eta mundu osoko milioika pertsonarekin. Itzali argiak eta egin planetaren alde!