Sitsak lepidopteroak dira, tximeletak bezala, eta horiek bezala, polinizatzaile bikainak dira. Landare espezie batzuk gauez polinizatzen direnez, oso garrantzitsua da une horretan lepidopteroak egotea; izan ere, erleek ez dute gauez polinizatzaile-rola betetzen. Beraz, sitsak funtsezko zeregina du landareen ugalketan.

Lepidoptero horrek rol asko ditu ekosistemetan. Esaterako, larbek landareen populazioak erregulatzen dituzte, eta haietatik elikatzen dira. Hori, sastraken kasuan, onuragarria da. Gainera, sits gazteak zein helduak beste espezie batzuk elikatzeko baliagarriak dira: hegaztiak, beste intsektu batzuk eta abar. Eta, azkenik, baina ez horregatik garrantzi gutxiagokoa, helduak landare-espezieen polinizatzaile garrantzitsuak dira.

Beste intsektu-espezie asko bezala, sitsen populazioak behera egin du urteen poderioz. Beraz, ekosistemetan duten garrantzia ezagututa, lepidoptero horiek ezabatu beharrean, kontserbatu egin beharko genituzke. Hona hemen etxerako gomendio batzuk:

• Leihoak irekita badituzu, argiak itzalita edukitzea garrantzitsua da, sitsak etxe barrura sar ez daitezen, argia erakargarria egiten baitzaie.
• Argiak isiotzea etxearen kanpoaldean, barrutik atera daitezen.
• Halaber, sareak jar ditzakezu, sitsak etxean sar ez daitezen. Horrela, beste bitxo batzuk (eltxoak, adibidez) barruan sartzea saihestuko genuke.
• Garrantzitsua da haiek ez akabatzea. Beraz, saiatu harrapatzen eta kanpoan askatzen.
• Azkenik, esan behar da proteina-iturri direla katu eta txakurrentzat, eta, beraz, ez dutela kalterik jasango halakoak jan arren.