Zizareak anelido txikiak dira. Lurra arakatzen dugunean ikus ditzakegu. Ez ditugu merezi duten bezala baloratzen, baina lur-zizareak ekosistemen benetako ingeniariak dira. Oso zerbitzu garrantzitsuak ematen dizkigute, hala nola lurraren osagai mineralak eta organikoak nahastea, uraren atxikipena hobetzea, elikagaiak landareei hurbiltzea, lurren emankortasuna areagotzea, haziak sakabanatzen laguntzea…

Zenbait faktoreren eraginpean bizi dira:

• Lurzoruen kutsadura kimikoa: azal biluziko animaliak dira, azaletik arnasten dutenak.
• Lurzoruen emankortasun biologiko ona: lurreko gai organikoez eta mikroorganismoez elikatzen dira.
• Zoruaren trinkotasuna: lurrean galeriak eginez bizi dira.
• Lurzoruaren hezetasunaren oso mende daude, eta, beraz, lehorteek mehatxatzen dituzte, gero eta gehiago.

Elikatzean, landare-hondakinak zatikatzen eta deskonposatzen laguntzen dute, eta, horrela, gai organikoak gehitzen eta elikagaiak lurzorura askatzen laguntzen dute. Horrek mikroorganismoen jarduna eta landareen hazkundea sustatzen ditu. Gainera, berotegi-efektuko gasen isurpena murriztu dezakete, karbono organikoa lurzorura gehitzen laguntzen baitute. Zizareek sortutako kanalen eta poroen sareak airearen eta uraren zirkulazioa errazten du lurpean, eta, era berean, lurrazaleko uren iragazketa hobetzen du eta lurraren higadura murrizten. Zizareek kanalak egiten dituztenean, zoruaren zati bat gainazalean geratzen da, lurzorua higadura-prozesuetatik babesten laguntzen duten zarakar moduko bat osatuz.

Beraz, haien presentzia, ugaritasuna eta dibertsitatea lurzoruen kalitatearen adierazleak dira.