Une honetan 608 Udal Etxebizitzatan daukate iturri berriztagarrietako energia-sistema jarrita; horren bidez, batez ere, ur beroa, berogailua eta igogailuko motorrentzako potentzia hartzen dute. Datozen bi urteetan Ametzolan eraikiko diren 66 etxebizitza dotazionalak batuz gero, guztira 674 udal etxebizitza izango dira energia berriztagarrien sistemekin.

Goyo Zurro Bilboko Udal Etxebizitzetako presidenteak adierazi du udal etxebizitzetan erosotasuna modu jasangarrian bermatzearen alde egin eta konpromiso irmoa dutela jarduera sozialaren eremu guztietan gestio arduratsua izateko.

Energia iturri berriztagarrietatik hartzen duten etxebizitza guztietatik 378k eraiki zirenetik dute energia-mota hori, 2006tik aurrera, alegia. Ibaiondo eta Errekalde barrutietako 298 etxebizitzatan, eguzki-energia termikoa dute eta Zorrotzako 80tan biomasa da energia-iturria.

Iturri berriztagarrietako energiaz hornitzen diren 232 udal etxebizitzak zaharberritze-proiektuetan ezarri dituzte era horretako sistemak. Guztietan eguzki-panelak jarri dira: horien bidez, batetik, igogailuetarako behar den potentzia jasotzen dute 114 etxebizitzatan eta 111 etxetan eguzki-panel termikoak jarri dira, ura beroa izateko. Gainerako 7 etxebizitzatan fotoboltaikoa eta eguzki-energia termikoa konbinatzen dira, ur beroa eta berogailua izateko.

608 udal etxebitzetarako energia hornitzen duten iturri berriztagarri guztietatik, erabiliena eguzki-energia termikoa da, 409 etxetan baitago; fotoboltaikoa 114 etxetan darabilte eta biomasa 80tan. 2019tik aurrera, beste energia-iturri berriztagarri bat gehituko da, hain zuzen ere Ametzolako 66 etxebizitza dotazionaletan: mikrogenerazioa.